Բրիտանական Radiohead խմբի գոյության պաշտոնական հետքերն անհետացել են համացանցից։ Օրվա ընթացքում Facebook և Twitter սոցիալական ցանցերում խմբի էջերից և radiohead.com պաշտոնական կայքից անհետացել է ողջ բովանդակությունը, հայտնում է BBC-ի ռուսական ծառայությունը։

Դատարկվել է նաև խմբի մենակատար Թոմ Յորքի Twitter-ի էջը։ Դատարկ է նաև Google Plus-ում խմբի էջը:

Խումբը պաշտոնական հայտարարություններ չի արել: Այս հարթակներից բովանդակության անհետացումը նշել են reddit.com կայքի օգտատերերը: Ինչպես կարծում են օգտատերերը՝ համացանցից հեռացումը կարող է խմբի նոր ալբոմի գովազդային արշավի մաս լինել:

Նախորդ երկու ալբոմները՝ In Rainbows և King of Limbs, թողարկվել են առանց անոնսի: Սակայն դրանց թողարկումից օրեր առաջ խումբն այդ անուններով իրավաբանական անձանց է գրանցել։

Լուրերն այն մասին, որ Radiohead-ը կարող է նոր ալբոմ թողարկել 2016 թվականի առաջին կեսին, շրջանառվում են արդեն երկար ժամանակ, նշում է լրատվամիջոցը։

Տարածել`