Հայաստանի Ազգային պատկերասրահում մարտի  11-ին բացվել է   «Իրանական մանրանկարչական արվեստ» ցուցահանդեսը:

Թեհրանի Ժամանակակից արվեստի թանգարանի տնօրեն Մաջիդ Մոլա Նորուզիի խոսքով, իրանական մանրանկարչությունը հազարամյա պատմություն ունի:  «Յուրաքանչյուր մանրանկարիչ իր ժամանակաշրջանում յուրովի է նկարել, բայց մանրանկարչության ավանդույթներն այնքան ամուր են պահպանվել, որ առկա աննշան փոփոխությունները նկատելի են միայն նեղ մասնագետներին:  Այստեղ ավելի քան 25 երիտասարդ մանրանկարչի ավելի քան 50 ստեղծագործություն է ներկայացված», – նշել է Նորուզին: Հիմնականում, շարունակել է նա, ներկայացված մանրանկարներն օգտագործվում են որպես գորգերի նախշեր, կան այնպիսի մանրանկարներ, որոնք արվել են իրանական գրականության, երգերի եւ հեքիաթների հիման վրա:

Հայաստանի մշակույթի փոխնախարար Ներսես Տեր-Վարդանյանն իր հերթին հավաստիացրել է, որ վերջերս հայ-իրանական մշակութային համագործակցությունը նոր փուլ է մտել: «Եվ դրա համար կան բոլոր նախադրյալները, ինչպես աշխարհագրական տեսանկյունից, այնպես էլ հաշվի առնելով ժողովուրդների բարեկամությունը:  Դրան կարելի է հավելել կողմերի միջեւ տարբեր հուշագրերի ստորագրումը, որոնք արդեն գործուն քայլ են այդ ուղղությամբ: Վերջերս Հայաստանի Ազգային պատկերասրահի եւ Թեհրանի Ժամանակակից արվեստի թանգարանի միջեւ ստորագրված հուշագիրը վերոհիշյալի լավագույն օրինակն է», – ընդգծել է Տեր-Վարդանյանը: Բացված ցուցահանդեսը, ըստ փոխնախարարի, իրանական ժամանակակից եւ ավանդական արվեստի ամբողջություն է:

Նշենք, որ Երեւանում «Իրանական մանրանկարչական արվեստ» ցուցահանդեսը բաց կլինի մինչեւ ապրիլի 11-ը:

Տարածել`