Փետրվարի 19-ը Ամենայն Հայոց բանաստեղծ Հովհաննես Թումանյանի ծննդյան օրն է: Վերջին տարիներին այս օրը նշվում է որպես` Գիրք նվիրելու

օր: Այս գեղեցիկ տոնի կապակցությամբ`  Խնկո Ապոր անվան ազգային մանկական գրադարանում երեկ մեկնարկեց «Կարդում են համալսարանականները» խորագրով շարքը: Այսուհետև, գրադարանի գողտրիկ անկյուններից մեկում` Հեքիաթի սրահում, Երևանի պետական համալսարանի նախկին և ներկայիս ուսանողները, դասախոսները կհանդիպեն գրադարան այցելող  փոքրիկ գրքասերների հետ և նրանց համար կկարդան պատմվածքներ, հեքիաթներ, բանաստեղծություններ…

«Կարդում են համալսարանականները» խորագրով շարքի առաջին հանդիպումը մեկնարկել է գերմանացի հայտնի մանկագիր Վալտեր Քրումբախի  «Ճանապարհորդ ոզնին» չափածո հեքիաթի ընթերցմամբ: Ոզնու արկածների մասին պատմող այս գեղեցիկ պատմությունը ՀՀ մարզերի և մայրաքաղաքի դպրոցականների համար

ընթերցեցին «Արմենպրես» լրատվական գործակալության տնօրեն Արամ Անանյանը, որը նույնպես ավարտել է ԵՊՀ-ի միջազգային հարաբերությունների ֆակուլտետը, Երևանի պետական համալսարանի իրավագիտության ֆակուլտետի 1-ին կուրսի ուսանողներ` Կարոլինա Հարությունյանը, Գոռ Դարմանյանը,  Համլետ Պետրոսյանը: Նշենք, որ Գոռ Դարմանյանը և  Համլետ Պետրոսյանը ծառայել են ՀՀ բանակում և մեր Հայրենիքի պաշտպաններից են:

Հիշեցնենք, որ ՀՀ մշակույթի նախարարության աջակցությամբ, Խնկո Ապոր անվան ազգային մանկական գրադարանը  ս. թ. փետրվարի 17-21-ը գրադարանում անցկացնում  են Մանկապատանեկան գրքի երևանյան 13-րդ ցուցահանդես-տոնավաճառը: Ցուցահանդես-տոնավաճառի շրջանակներում գրադարանում անցկացվում է «Նվեր զինվորին» ակցիան. Գիրք նվիրելու օրվա կապակցությամբ գնելով Ձեր նախընտրած գիրքը, հնարավորություն ունեք այն նվիրելու զինվորին: Ցուցահանդես-տոնավաճառում գործում է տաղավար, որտեղ և կարող եք թողնել  Ձեր ընծայագրով գիրքը` զինվորին փոխանցելու համար: Այսօրվա հեքիաթասաց-համալսարանականներն  իրենց գրքերով ևս  միացան այս գեղեցիկ ակցիային:

Լուսանկարներ` Նարեկ Ավանեսյանի

Աղբյուրը` iravunk.com

Տարածել`