Լույս է տեսել 365 երգ պարունակող նոր ժողովածու

Ժողովրդի կողմից սիրված 365 երգ՝ խոսքերի և մեղեդիների ճշգրիտ շարադրանքով ու դրանք ուղղորդող նվագակցությամբ.լույս է տեսել «Ազգային երգարան.365 երգ» ժողովածուն: Երգարանը բծախնդիր ու սիրով կատարված աշխատանքի արդյունք է և ներառում է հայ երգի գրեթե բոլոր ժամանակաշրջաններն ու տարատեսակները՝ խմբված ըստ բնույթի, ժանրի, թեմատիկ նյութի, հեղինակի և այլն:

Հեղինակն արդեն 27 երգարանների կազմող, մշակութային գործիչ Սամվել Հարոյանն է, ով վստահ է, որ տունը, ուր երգարաններ չկան, նման է հոգուց զուրկ մարմնի, և հայ մարդու համար երգարաններն առանձնահատուկ նշանակություն ունեն: «Բազմաթիվ տարիներ զբաղվելով հայ երգով՝ հասկանում ես, թե ինչքան կարևոր է այն հայ մարդու համար: Հայ երգը մարդկանց սրտերն իրար կապող կամուրջ է, կամուրջ, որը կապում է տարբեր սերունդների: Մենք այդ երգերի միջով իմանում ենք հայ մարդու, նրա կենցաղի մասին: Այս գործը շարունակվելու է, մենք անընդհատ մատուցելու ենք ձեզ ճշմարիտ հայ երգը»,-գրքի շնորհանդեսի ընթացքում նշեց Սամվել Հարոյանը:

Երգարանը լույս է ընծայել «Էդիթ Պրինտ» հրատարակչությունը: Հրատարակչության հիմնադիր-տնօրեն Մկրտիչ Կարապետյանը շնորհավորեց ներկաներին գրքի հրատարակման առթիվ: «Մեզ, իրոք, պետք էր ազգային երգարան, որը երբեք չի հարատարկվել: Երգարանը պետք է լիներ գեղեցիկ, հարմար: Թող բոլորիս տանը լինի այս երգարանը, և թող բոլորը երգեն այս երգերը»,-նշեց նա: Երեկոյի ընթացքում հանդիսատեսին ներկայացվեցին «Ազգային երգարան.365 երգ»-ում տեղ գտած երգերից բաղկացած գեղեցիկ համարներ:

Նշենք, որ երգարանի հիմնական նպատակն է՝ նոր կյանք հաղորդել ներառված երգերին թե՛ բեմերում և թե՛ երգասերների ամենատարբեր միջավայրերում՝ կենցաղում,այլազան առիթների ժամանակ բավարարելով տարբեր ճաշակի երգասերների պահանջները։

 

 

Աղբյուրը՝  menq.org

Տարածել`
Share

You may also like...

Sorry - Comments are closed