Իրավաբան-բանաստեղծը հանրության դատին է ներկայացրել իր ստեղծագործությունների ժողովածուն

Իրավաբան-բանաստեղծ Նոր-Այրը (Նորայր Հակոբյան) իր առաջին փորձն է կատարել գրական աշխարհում և ներկայացրել իր ստեղծագործություններն ամփոփող գիրք:

«Երգ` առանց մեղեդու» բանաստեղծությունների ժողովածուի շնորհանդեսն անցկացվել է հուլիսի 31-ին Երևանի Ավետիք Իսահակյանի անվան կենտրոնական գրադարանում: Գիրքը տպագրվել է «Զանգակ» հրատարակչությունում:

«Ես գրող չեմ, մասնագիտությամբ իրավաբան եմ: Գրքում զետեղված է այն ամենն, ինչ ապրել եմ և կարողացել եմ թղթին հանձնել: Չկա սարքած տող, չկա սարքած բառ: Իմ կյանքում լավ բաները միշտ պատահական են լինում. գրելն էլ պատահական ստացվեց: Սկսել եմ ստեղծագործել 2013 թվականից` 27-28 տարեկանում: Ընկերներիս հորդորով այդ ամենը գիրք դարձավ»,- «Արմենպրես»-ի փոխանցմամբ` նշել է Նորայր Հակոբյանը:
Բանաստեղծի խոսքով` գրելու շարժառիթը դարձավ կյանքը սիրելը: «Ես սիրում եմ կյանքը, սիրում եմ պայքարել: Բանաստեղծությունները հիմնականում սիրային, խոհափիլիսոփայական, նաև հայրենասիրական թեմաներով են գրված: Գրքում մոտավորապես 110 ստեղծագործություն կա»,- ընդգծել է նա:

Գրքի խմբագիր Հակոբ Սրապյանն ընդգծել է, որ թեև հեղինակն իրեն գրականության մարդ չի համարում, բայց բանաստեղծություն հասկացող մարդը զգում է, որ Նորայրն ի ծնե բանաստեղծ է:

«Նորայրի մոտ ամեն ինչ կա` և պատկերավոր խոսք, և ժամանակակից շնչառություն, և ըմբոստ տեսակ: Գրքում լուրջ բանաստեղծություններ շատ կհանդիպեն: Վստահ եմ, որ հաջորդ քայլերն ավելի հաջող են լինելու»,- ասել է Հակոբ Սրապյանը:

Ավետիք Իսահակյանի անվան կենտրոնական գրադարանի տնօրեն, ՀՀ մշակույթի վաստակավոր գործիչ Հասմիկ Կարապետյանը տեղեկացրել է, որ Նորայր Հակոբյանի ստեղծագործությունների առաջին ընթերցողներից է եղել: Նա ընդգծել է, որ բանաստեղծը շնորհանդեսից առաջ շատ հուզված էր, անհանգիստ և անհամբերությամբ էր սպասում միջոցառմանը:

Տարածել`
Share

You may also like...