Գրանադայում հայազգի ժամանակակից նկարիչների ցուցադրություն է բացվում` ի հիշատակ Ցեղասպանության զոհերի

Իսպանիայի Գրանադա քաղաքի արքեպիսկոպոսարանի «Քրիստոնեության ուսումնասիրման միջազգային կենտրոն» հիմնադրամը Հայոց ցեղասպանության 100-րդ տարելիցի առթիվ այս տարվա ընթացքում հանդես է գալիս տարբեր միջոցառումների կազմակերպմամբ` ոգեկոչելու զոհերի հիշատակը:

Ոգեկոչման արարողությունների շրջանակում  հիմնադրամը  Գրանադայի արքեպիսկոպոսարանի «Նոր տուն» մշակութային կենտրոնի և Հայոց ցեղասպանության 100-րդ տարելիցի միջոցառումները համակարգող հանձնաժողովի հետ համատեղ հայտարարում է հայազգի ժամանակակից նկարիչների գործերի ցուցահանդեսի բացումը:

Ինչպես հայտնում է արքեպիսկոպոսարանի կայքը` ցուցահանդեսի բացումը տեղի կունենա հուլիսի 17-ին` «Նոր տուն» մշակութային կենտրոնում`ցուցադրության համակարգողներ Հայկ Գրիգորյանի և Գոհար Վահանյանի ներկայությամբ: Ցուցահանդեսը բաց կլինի մինչև հոկտեմբերի 16-ը:

Ընդհանուր առմամբ, ցուցադրվելու է 14 հայ նկարչի 63 աշխատանք, որոնք պատկերվել են գեղանկարչության և փորագրության տարբեր տեխնիկաներով: «Գողացված մանկություն» խորագրով ցուցահանդեսին ներկայացված են նաև Հայոց  ցեղասպանության թեմայով աշխատանքներ, որոնց թվում են ինչպես հայոց մշակույթը ներկայացանող, այնպես էլ Արշիլ Գորկիի արվեստով ոգեշնչված գործեր, ով ևս Ցեղասպանության որբերից էր:

Տարածել`
Share

You may also like...