ՀՀ նախագահ Սերժ Սարգսյանի հրամանագրով Արմեն Ամիրյանն ազատվել է Հանրային հեռուստառադիոընկերության խորհրդի անդամի պաշտոնից:

Այս մասին հայտնում են ՀՀ Նախագահի աշխատակազմի հասարակայնության և տեղեկատվության միջոցների հետ կապերի վարչությունից։

Նախագահի մեկ այլ հրամանագրով Արմեն Ամիրյանը նշանակվել է Հայաստանի Հանրապետության մշակույթի նախարար:

Կենսագրություն 

Մշակույթի նորանշանակ Արմեն Ամիրյանը ծնվել է 1967թ.՝ Երևանում, անկուսակցական է: Սովորել է Երևանի Խ. Աբովյանի անվ. հայկական պետական մանկավարժական ինստիտուտում, մասնագիտությամբ՝ կուլտուր-լուսավորչական աշխատանք, ունի  դոցենտի գիտական կոչում:

Ազատորեն տիրապետում է ռուսերեն և անգլերեն լեզուներին: Զինապարտ է: Պարգևատրվել է Մովսես Խորենացու մեդալով, ստացել է ՀՀ մշակույթի վաստակավոր գործչի կոչում:

Որպես խրախուսանք ստացել է Հեռուստատեսության և ռադիոյի միջազգային ակադեմիայի  ոսկե մեդալ,  Ֆրիտյոֆ Նանսենի ոսկե մեդալ, Երևանի քաղաքապետի ոսկե մեդալ:

Աշխատել է Հայկական ՍՍՀ հեռուստատեսության և ռադիոհաղորդումների պետական կոմիտեում որպես  ռեժիսորի ասիստենտ,  Հայկական ԽՍՀ հեռուստատեսության և ռադիոհաղորդումների  պետական կոմիտեում որպես հեռուստահաղորդավար:

Եղել է  «Հայաստանի ազգային  ռադիո» պետական փակ բաժնետիրական ընկերության գործադիր տնօրեն, Երևանի Խ. Աբովյանի անվ. հայկական պետական մանկավարժական համալսարանի  կուլտուրայի ֆակուլտետի հեռուստա և ռադիոլրագրության ամբիոնի ղեկավար:

2015 թվականից առ այսօր Հանրային հեռուստառադիոընկերության խորհրդի անդամ է:

1990-1995 հեղինակել է «Խճանկար», «Խաչմերուկ», «Բարի լույս» և այլ հաղորդումները:

1996թ. – հիմնել է «Ար Ռադիո Միջմայրցամաքային» ընկերությունը և «Արմենակոբ» մշակութային կենտրոնը, որը ծառայել է մի շարք բարեգործական ծրագրերի իրականացմանը:

Հայ առաքելական եկեղեցու Արարատյան հայրապետական թեմի հոգևոր խորհրդի անդամ է:

Անդամակցում է նաև Հեռուստատեսության և ռադիոյի միջազգային ակադեմիային և արժանացել է հիշյալ ակադեմիայի ոսկե մեդալի:

2000թ. – ստեղծել է «Արմենակոբ» հեռուստաընկերությունը: